شعمت ناري لبوخالد ولقمت
دلة وفا واسوقها للسنافي
والطيبه لو هي بعيده لهارمت
رجلي وراها ما تمل الوقافي
مشكور يا قافٍ بوجهي تبسمت
مثل العروس اللي بليل الزفافي
انا يابو خالد دريب وتولمت
يومن خلان الرخا ماتشافي
وأخذت ما قلته لنايف وسلمت
ابيات شعرٍ ما عليها أختلافي
عز الله أني من قصيدك تعلمت
جاك الصحيح ودوك صك اعترافي
أنته يابو خالد بوقتك تزعمت
تجود وأن شحت سنينٍ اعجافي
وافٍ على ركب المراجل تقدمت
ثوبك يابو خالد من الطيب ضافي
دكتور شعر وفي بيوتك ترنمت
فكرك عليه احلى القصيد متلافي
تقول همت بحب ريم الفلا همت
سارٍ بليلٍ نور قمراة طافي
دريت عن شكوى الغرام وتألمت
ذكرتني في حب شيمه ووافي
ودامك تقول العام في بحرها عمت
واليوم كنك مايلٍ للضفافي
عساك من جور الهوى ما تظلمت
وأخذت حقك يا زعيم القوافي
