أول الليل طرّف .. وأول الهم شرّف

كل ليل مقيم ولك همٍ مقيم

آه واهمّي اللي مانوى انه يطرّف

كن قلبي مكان وكن همّي غشيم

قلت: يا قلب هذا الهم وأنته تصرّف

ضيف والضيف يبغى له معزّب كريم

والندم قلت ابن شرعي لسوء التصرّف

قال: أنا معك في هذا كلامك سليم

بس ما ابغى تقول الحب مابه تطرّف

ما يرد الكريم إلا لسان اللئيم

قلت: وش بك تعرف شيّ أصلاً معرّف

من دموع الغلا تنزف دموع اليتيم

يا زماني محرّف أو أنا اللي محرّف

دام كل الدواير عندنا تستقيم

قال: تدري وش أنت تقول قاعد تخرّف

ما امتلت بالمنام ألا عيون الحريم

قلت: يا هم شرّف واللّه إنك تشرّف

في زمانٍ غدا مبداه مبدا سقيم