لين العود.. وش بك كل يومٍ تشرّه؟!
كنت محتار.. خلي ويش عكَّر مزاجه؟!
أثره الوقت غيَّر مَن خفوقي مقره
حسبي الله.. زماني ويش ثوّر عجاجه؟!
داري انك حبيبٍ مايريد المضرّه
لانويت الحرام.. ولامشيت بسماجه
بس عيبك تصدق كل واحد تمره
لين صارت حياتي مع حياتك لجاجه
حسبي الله على اللي ما كفى الروح شره
غير فرقا الولايف ما له النذل حاجه
ماهقيتك حبيبي - وانت بالقلب درّه
تنكسر للعواذل مثل كسر الزجاجه
إنشد الخافق اللي مات سبعين مره
عقب عذب الغرام اليوم يشرب هماجه
إن غيرك لقلبي مايجيب المسرّه
بس هوِّن على قلبٍ تعذّر علاجه
أنت تخطي - وانا اخطي.. والخطا قدّ ذرّه
والمشاريه ما هي حل يوم انتواجه
