انا ابا انشدك عن شي يزورك بالسنة مرة

والى احتجته قضى الحاجه بسرعة ما اطيب افعاله

يطب البيت والمكتب ولا تلقى له الجره

والى منه مضى له يوم شفت النقص باحواله

تعالي يا ربابه في يدي.. ناخذ لنا جره

نغني اللغز «للحربي» وللاجواد امثاله

ترلى حل اللغز «رزنامة» مزيونة مره

ترحب بالمعاكس.. قام يغازلها بتجواله

يا خالد لغزك المنشور اظنه سهل بالمره

ولكن ما يحل اللغز غير افكار جواله

وجاك الحل يالحربي وعاه الفكر ماغره

يعد ايامنا التقويم وحنا عنه غفاله

تحيه وافية لأهل التراث اغلا من الدره

تغطي معجزات اللغز في تقدير حلاله

ولو مافيه من ما قلت ما قد يازن الذره

يعد ايام دهر ثابت تغنى بها اجياله

اكاليل الورود اللي تلم الود وتثره

على صدر التراث اشوفها تزهى وتزهى له

يروح العام والابداع عنها ما نقص ذرة

حقايق عاشها (التقويم) ماجت صدق تهدى له

بيوتك تنعش الخاطر ومنها النفس مستره

ولغزك رميت الشاطر وقافك جبت معداله

نجيب الحل بالحاضر وبدع القاف والجره

نقوس البحر وناظر جزيل الغطو والقاله

وهي رزنامتك تنقص بحلو الوقت والمره

وبعض الناس تقويمه بجيبه لافطنا له

قريت اللغز يا خالد ومنه النفس مستره

جميل اللفظ والشاعر تحب اللحن لا شاله

ترى حله هو التقويم ما باه ما مره

يجيك احساب في جدول تعرف الوقت باقواله

قرينا لغزكم والفكر يقبل فيه ويفره

لكن اللي جهل باللغز ما يطري على باله

وهذا اللي به التاريخ في برده وفي حره

نعرفه واسمه التقويم في حله وترحاله

ترى وقت الربيع اقف وجاك الصيف في حره

به البدوان تنزل بعد ما كانت معم الديان رحاله

سنة قفت وراحت في عملنا خيره وشره

ولا احد يعرف اللي فات يا خالد من عماله

وحل اللغز هو التقويم واضح وانكشف سره

ابو منصور وزعهن علينا يا جماعه كل لحاله

من قصيباء نبي نرسل بيوت كنه الدره

نبي نشارك بحل اللغز في وزنه ومنواله

جميع الناس يا خالد على التقويم مضطره

وليا منه مضى له يوم شفت النقص باحواله

سلام الله على خالد بوصفه نخفى الجره

تعمل يخفي الموصوف في حله وترحاله

ترى لو يخفي التقويم من حرصه وسط جره

لزوم يمزع اوراقه ومنها النقص في حاله

هلا يا مرحبا باللي غدا لغزه كما الدره

اهلي بك عدد ماطش شختار من خياله

قرينا اللغز يا الحربي ومنه النفس منسره

جواب الحل رزنامه تبين وقتنا وحاله

سلام الله سلام يفرح الرجال ويسره

وانا ياهل التراث ان غبت ماني عنكم ابداله

والا يا مرحبا باللغز واللي يمنا فره

وترى التقويم يا خالد يبي يرتاح من شاله

هلا يا مرحبا باللي يقول اللغز ويقره

تحيه من هاجوس يبدع القيفان وامثاله

اشوف الوقت يا الحربي مضى حلوه مضى مره

لنا التقويم نحسب به نهار الوقت ولياله

قرينا في صحيفتنا كلام من قرا سره

بيوت اللغز جزله عشت يا من يجزل اقواله

مكاتبنا منازلنا مع الايام مضطره

لتقويم نعد العام به حله وترحاله

هلا باللي كتب لغز.. وبيده بالقلم جره

عدد منهو مشى بالارض وظله دوم يبراله

يا خالد لغزكم واضح صحيح ان ماله الجره

ترى التقويم يالحربي تناقص دايم احواله

على نظم القوافي والمعاني نتبع الجره

مع اهل الجيش نمشي وان لقينا الخيل خياله

بداية عامنا الهجري اشوف اوجيه مستره

ترى التقويم ما يثبت يجيه مغير احواله

يقول اللي الى منه بدا لازمه لو مره

على غير الولي ما قط يوم يشكي احواله

الا ياللي كتبت اللغز.. لغزك واضح سره

ترى التقويم هو حله يجيك الرد في حاله

سلام الله عليكم والليالي حلوه ومره

سلام من رجال كيفها في وسط فنجاله

بدا عام جديد وراح عام بخيره وشره

وتقويم جديد نحسب ايامه مع لياله

الا يا خالد الحربي عسى الاحوال مستره

ولغز مثل لغزك جازلي باجاوب سواله

هذا التقويم بالمسجد نطالع فيه كم مره

ولامنه مضاله يوم وجه غير ابداله

هلا يا مرحبا ترحيبة مره باثر مره

عدد ما هل وامطر من حقوق المزن هماله

بدايتنا ترى عشرين بالتقويم من غره

رحل عام وبقى عام عسانا نحسن اعماله

الا ياخالد الحربي عساك بخير ومسره

عسى ربي يوفقكم لفعل الخير واقواله

قريت اللغز واعجبني وابا احله بها المره

ترى التقويم نحتاجه نعرف الوقت واحواله

هلا في صفحة طلت علينا كنها الدره

والايا مرحبا باللي بها ما خابت اعماله

ولغز الشاعر الماهر يريح القلب ويسره

ترى التقويم يا خالد بوقتك زادت اشكاله

بجهدك يالحميدي صارت الصفحة كما الدره

يقوله واحد من جاملك في واقع قاله

صحيح النقد والتقويم ماله فيه بالمره

ولكنه يقول الحق لو يحسب على حاله

يقول الشاعر اللي نظرته لا يمكن اتغره

لدي حل صحيح والخطوط اثنين شغاله

ترا التقويم تاجد له كثير الناس مضطره

وله في ساحة الشعر النقي قدره ومنزاله

اشوف الغازكم ياهل الجزيرة واضحة مره

تحل عقودها بسرعة اليا عقدتم احباله

عسى التقويم.. من يشريه يوعد به ولا يغره

عليه اليوم والتاريخ في حله وترحاله

تلف ارقاب وتنشد النظر والروس مفتره

على القمة تراثك يالجزيرة فاز برجاله

مع التوفيق لو كبر الحجر ما يكسر الجره

ولو يصفق سراب الياس كله ما ملى بياله

نحسب ايامنا واليالنا ولنفس مغتره

على التقويم يا عمر الامل شفته على حاله

على الغالي كثير الناس يا هل العرف تتشره

ولولا الود ما جت تشعب الشرهة وتسعى له

تعزوى بالغلا وتسابق (التقويم) في فره

وراع الطيب كل ينتظر طيبه وفنجاله

شعور كل ما قلت انجلى عاود لي الكره

يعيش بداخلي.. وايام ياخذني على جاله

عليه من الفرح طوق زهاه بخيره وشره

كما التقويم حدد بالزمن حله وترحاله

عساه ايعود وقت فات فيه النفس مستره

ربيع وفقع والقب المشقّار رايق باله

تقويمه زل ياليته علينا يعاود الكره

ومن يسأل لقى حل السؤال الجمعه اقباله

لها التوفيق صفحتنا تسير وتثني الكره

وعلى راس القمم ترسي وتدفق زين شلاله

نجح منهو لها اتعب مطايا فكره ..وسره

تفوقها على الباقي تفوق بانت ابطاله

واما اللغز يا خالد جميل وزين بالمره

وترى حله هو التقويم عن النسيان يعنى له

هلا يا مرحبا واللغز له وجهه وله جره

وانا قصيت جرة لغزكم وعرفت منزاله

وجاك الحل واقره وان بغيته باللحن جره

وهو تقويم تقرا به دخول الشهر وهلاله

حقيقة لغز ممتاز ونظمه حلو بالمره

الا يالله توفق من نشره وتقبل اعماله

ترى التقويم هو حله لزوم خالد يقره

على المكتب على الحائط نحطه ما اطيب افعاله