توي فرحت اعلنت للناس فرحات
وتسابقن خلف العباره عباره
ها الحين صار لنظم الاشعار لذات
ولا نظمته قاصدٍ به تجاره
اليوم اردد من ضميري سلامات
ساعة وصل سالم لشعبه وداره
سلطان اهلي بك فخر كل الاوقات
من كل خصلة جود فيك انت شاره
مية هلا في رجعتك جهر واسكات
يانور كل الكون وانته فناره
اهلا هلا تعداد الاحيا والاموات
وعداد مازان الربيع بخضاره
يصير لي في مدح ذاتك وجاهات
كريم متواضع حليمٍ واماره
وايضا لحبك وسط قلبي علامات
وجمايلك من فوق راسي مناره
يابو الكرم ماللبخل فيك طمعات
انته عمار المال وانته دماره
يمناك ما تعطي لجمع الشهادات
لله تبذل مادرت به يساره
تعطي ونعطي من يمينك عطيات
وانت العطا وانته هواه وشعاره
متعليٍّ من فوق نجم السماوات
اسمك وخلدته ليان وجساره
يا جاليٍ كل الامور المهمات
يابو الضعيف وفزعته وانتصاره
ياسيدي يا سيد كل السيادات
يا ملتجا المضيوم وان جاه غاره
تباشروا في جيتك جمع واشتات
كلٍّ فرح.. عزم على العيد جاره
ومن الفرح هلت على الخد دمعات
من عين خشفٍ شب بالقلب ناره
ومن الفرح جوا لك يشيلون عرضات
بصدورهم والشيخ طال انتظاره
ومن الفرح في وجيههم ابتسامات
يلقون عندك كل عز ووقاره
قالوا هلا في رجعتك يابو الاقوات
بعد الإله الفقر منك انصهاره
وخادمك لو يكتب قصيد ومقالات
مقصرٍ فيك انت هذا قراره
لكن غلاك بوسط عمري مسافات
في كل يوم يزيد ليل ونهاره
والشعر ياتي له قفول ونهايات
ان شاب قافه ينقفل انهداره
لاشك جودك ينحكى به روايات
مخلد بالناس صعب اندثاره
يا الشهم لو انشي ملايين الابيات
ما احصي عشر جودٍ خذيته جداره
ارفع حصن بالمجد لك فيه رايات
شهمٍ غلاك بوسط دمي مساره
ياسيدي مالي على الشعر لذات
ولا نظمته قاصدٍ به تجاره
ان كان ماهو مدح فيك انت بالذات
خسارتي ياكبرها من خساره
