نشرنا في عدد الاسبوع الماضي لغزاً كتبه الشاعر فهد بن عقيل الطويان من مدينة بريدة يقول فيه:
|
ياويش رجل ينقل العلم وابكم
والى انقطع راسه تكلم لسانه
أعمى يدلونه وهو مغلق الفم
ولو يتركونه مايغير مكانه |
وقد وصلتنا عشرات الحلول معظمها ظنه «القلم» وهو ظن خاطئ، اما الحل الصحيح فموجود في ثنايا ابيات من اخترنا حلولهم التي اكتملت فيها شروط النشر وجاء على النحو التالي:
|
الحمدلله كل جاهل تعلم
بعد الجهل كل سعيد بزمانه
ياشاعر الالغاز ياعل تسلم
دوكم جوابي قبل فوات اوانه
ظرف الرسالة وارد يالمعلم
والحل جاكم يالسنافي بيانه |
محمد البوجان الشراري الحديثة
*****
|
يابن عقيل اللغز لارمع من ثم
اخاف من رمعه على غير خانه
راعي البريد يوصل الخط من كم
والخط يارجال مثل الامانه |
سعد صنهات السهلي الدرعيه
*****
|
يامرحبا.. ويدوم عمرك وتسلم
ياشاعر بالقاف مرفوع شانه
نبغيك وامثالك علينا تكرم
ونعود لتراث توارى زمانه
اكيد حل اللغز «ظرف» مختم
في داخله خط يهيض بيانه |
مشاري خالد الدعجاني شقراء
*****
|
انا اشهد انك للمثايل ولد عم
يمناك تنقش كل زين بامانه
لا جاك مكتوبي بظرفه له افهم
والحر تكفي له اشارة بنانه |
ابراهيم محمد الشبرمي الدمام
*****
|
يابو عقيل اللغز واضح ويفهم
واللي قرا العنوان حدد مكانه
هذي الرساله يا فتى الجود تسلم
ان كان طاب الظن صادق حصانه |
مبارك بن محمد العجمي الرياض
*****
|
ياللي صنعت اللغز قافك محكم
والرجل عقله ينعرف من لسانه
ورسالة المكتوب ياما خدمتكم
كم واحد يقضي له الظرف شانه |
ذاير رشيد السحيمي المدينة المنورة
*****
|
هذا هو المكتوب والله اعلم
كم كاتب للخط يضبط بيانه
والحر بالشارات يعرف ويفهم
هرج العرب ماهو بهرج الرطانه |
فهد الحزاب الرس
*****
|
انا اشهد ان اللغز وافي محكم
ولغز الجزيرة دوم عالي مكانه
واللغز حله يافهد عندك اعلم
ظرف الرسالة يوم نقرا بيانه |
خليف الحربي الرياض
*****
|
شوف الجزيرة يافهد يجلي الهم
واللغز جانا يافهد في مكانه
ظرف الرسالة يعرفه من تعلم
والجاهل المسكين يجهل بيانه |
مساعد بن عبدالله الطريقي الزلفي
*****
|
يابو حمد بلغ سلامي وتسليم
مني لابو خالد رفيع المكانه
قله ترى راشد عن الحل يعلم
قصدك به المظروف هذا بيانه |
راشد ناصر الشقيق الاسياح
*****
|
ياما يجي لك يابريدي من الكم
رسايل توضع سواة الأمانة
ساعة فتحت «الظرف» شفته يسلم
ياحيف يالاخوان ما اطول زمانه |
ابو هاني السعدي المدينة المنورة
*****
|
جيت يالغز قريناه محكم
واللي نشد يبي الخبر مع بيانه
من شان علم الظرف يشمع ويختم
والفاكس هذا اليوم انهى زمانه |
هلا الحضيف الرياض
*****
|
هذا الجواب اللي بزرفه مبلم
مع الموزع عارفين بيانه
واليا وصل صاحبه اطرم مسلم
ماينقري ياكود تقطع عنانه
ينبيك عن غايب بخطه تكلم
عده وصل لو ماتعدى مكانه |
مبارك بن خليفه العنزي الجوف
*****
|
يا الله عسى اللي سطر اللغز يسلم
والحل واضح نرسله في اوانه
تنشد عن الرجال ونقول لك سم
«ظرف الرساله» والله اعلم بشانه |
عطا الله بن سليمان العطا الله الزلفي
*****
|
لغز جميل واكثر الناس يعلم
بالصفحة الغراء قرينا اعلانه
واللغز واضح مايبي له مترجم
وظرف الرساله ياصلك من مكانه |
سعد الدوسري الرياض
*****
|
سر ياقلم فوق الصحيفه تكلم
والحل اضع له بين قوسين خانه
وإمن عليه بجوف «ظرف» مبلم
الى انقطع راسه تبين الامانه
عرفاني اشهد به الهي ويعلم
انه لابن نفجان فارس زمانه |
حمود العطاوي عفيف
*****
|
قريت لغز بالجزيرة محكم
لغز الفهيم اللي فصيح لسانه
ظرف الرسايل بالطوابع يختم
هذا جواب اللغز واضمن ضمانه |
سعود جازي الحربي الرياض
*****
|
ماغبت عنكم ياهل العرف واقسم
الهيل ماحطيت به زعفرانه
عساك ياراع المواجيب تسلم
يابو حمد لك بالتميز مكانه
العلم في ظرف الرساله ومحكم
والى انفتح ينثر غلاه وحنانه |
محمد عبدالكريم الغزي الزلفي
*****
|
لازال حال تراثنا في تقدم
له في بلد الاسلام قدر ومكانه
على الجواب الرمز واسم المكرم
ومن داخل الصندوق خافي بيانه |
ابو امواج الرياض
*****
|
طاب اللقاء ياخوان والخير خيم
وطير السعد غنى وردد الحانه
يابو عقيل الناس بالجزل تهتم
والظرف نال وشاح باول زمانه |
فهد الجروان الزلفي
