العلم مرفوع والفكر حاضر للجواب
والهواجيس اعتزت وبذلت ميسورها
للمهمه والمهمه لها يحسب حساب
وكل نفس تجتهد دايم بمقدورها
المهم ان الخطا مايوصف بالصواب
فرق شاسع والكتابه تشاف سطورها
كل ماصغت المثايل نلبسها الثياب
الثياب الضافيه والدرر ببحورها
تتعب السباح وليا لقاها الحظ طاب
والعلوم الوافيه ينتظم طابورها
انفتح للسالفه والمعاني كم باب
يارجال باللقاء ماتضيق صدورها
عد ما خط القلم وسط صفحات الكتاب
وعد نبت فياض عشب تفوح زهورها
ياسلام الله سلام بعثناه انتداب
من هواجيسي هديه لنمر نمورها
لولي العهد راع الوفا سمح الجناب
راعي اليمنى الكريمه ووافي شبورها
ابو متعب كان شان الدهر ذيب الذياب
جاره الله من صدوف الليال وجورها
فاتح بيبان قصره لشيبان وشباب
للقضايا والمهمات قام بدورها
يعتق الاقارب يرجي من الله الثواب
كاسب كل الجمايل وراعي كورها
وشجرة آل سعود درع لنا يوم الصعاب
تنشف الارياق والشمس يحجب نورها
عجت الخيل الاصايل مثل دهم السحاب
ترهب العدوان والموت قدم نحورها
ويا موردة القنا يامتعبة الركاب
يوم تنشب جابة الخصم في حنجورها
العلم مرفوع والشكر مضمون الجواب
واعذروا هواجس قدمت ميسورها
