لا يا زمان ارجوك خلك معايه

لا تجتمع مع بعض الانذال ضدي

لا يازمن خانوا جميع اصدقايه

وشفت الصداقه عكس ما كان ودي

وين الصديق اللي يحارب عدايه

لو غاب ماضنيت غيره يسدي

وش السبب يا ناس وشو خطايه

وانا معاكم ما تجاوزت حدي

عايش وحيد بحيرتي مع شقايه

يا ليتني ما بديت للناس سدي

في كل ليله حاير من مسايه

واسهر كما يسهر على الباب جندي

غابت نجومي واختفت من سمايه

وانام دمعي سافح فوق خدي

وقت الرخا تلقاه فيه الكفايه

ووقت الشدايد غاب عنك وصدي

ما ابي الردي لو هو اعز اقربايه

ولو كان جده من صماصيم جدي

ما ابيه نقال الحكي والوشايه

دايم كلامه بين مد وشدي

وقصرت عن راعي النمايم خطايه

هذاك ما اظنه صديق يعدي

ولفيت عن بعض المجالس رشايه

وتركت ناس رايهم ما يقدي

واقول قول الشمري بالنهايه

«الله على دور مضى لو يردي»