اهرج بوجهي لا تهرج بقفايه
هرج القفا ما هوب سلم الرجاجيل
لابيض الله وجه راع الوشايه
ياكل عروض الناس ماله محاصيل
لا تفشي اسراري وتذكر خطايه
عند الملاء وتفصل الهرج تفصيل
تزعل محبيني وترضي عدايه
سود الوجيه مجمعين الاقاويل
ما همني صوت الثعالب ورايه
نهارها نرقد خفافيش بالليل
نطلب لغاوين السبيل الهدايه
درب الرشاد وترك درب الاباطيل
فعل الردى مذموم والطيب غايه
تطمح له العراف جيل بعد جيل
اوف بوفاك وشوف مني وفايه
البس ثياب العز لا تقبل الميل
درب العلا لو كان فيها شفايه
اخير من عيشة رجال دعابيل
صاحبي واعرف الربح من مشترايه
ليا خسروا التجار بالوزن والكيل
مرفع على جهال ربعي عصايه
واحلم على عقالهم لو بهم ميل
دنياك لو تضحك لكم بالبداية
نمشي وتطويلك سبور المحابيل
وحل الرحيل ابكم وجات النهايه
كل كتابه في يمينه الى سيل
