قلبي على متن السحاب اللي تقفاه الهبوب

يمشي تحت نور القمر يشوف وجهه من قريب

يزفه الشوق الحنون مشتاق ماهوب مغصوب

حتى الضلوع اللي تضم القلب صايبها نحيب

وجه القمر فيه الدرر القلب من شوفه يذوب

لا يا قمر هذا عذاب قلبي من أسبابك صويب

قلبي على شوفك شفوق واصلك مع صعب الدروب

قلبي وفي. طبع الوفي. يمشي مع الدرب الصعيب

كل المشاعر تنحني لك غصب عن غيرك تتوب

مع نور وجهك ترسل الأشواق للقلب ويطيب

تمتع بنور القمر تهن يالقلب الطروب

ما دام في جو الفضا تهن ماعندك طليب

ما دام فيكم غريب تبادلوا سر القلوب

كلٍ يقول اللي يريد ما دام ما فيكم غريب

يضيق صدري واظلمت دنياي في وقت الغروب

من غير وجهك يا قمر مالي بها الدنيا صحيب

منزلك عالي فالسماء سبحان علام الغيوب

اللي جعل لك منزله فالقلب حتى لو تغيب