من يستحق الجايزة غير سلمان
اللي جهوده للجميع معروفه
جت له وهي به تفتخر طول الأزمان
ولو ماجت لسلمان جتها الحسوفه
سلمان في وصفه ترى الشعر طربان
وبيوت شعري في مديحه شغوفه
يامير في مدحك تنقيت الأوزان
وبستان شعري دانيات قطوفه
قصيدتي يامير تفخر وتزدان
لاصارت بمدحك يامير معزوفه
ياكافل الأيتام ياخير معوان
على الزمان اللي تعاقب صروفه
ياخادم الاسلام في كل ميدان
فعلك ظهر في كل بقع تطوفه
يمناك رحمة لليتامى وتحنان
وربي خلقها لليتامى عطوفه
تشهد لك الايتام في كل الأوطان
شي نشوفه والخلايق تشوفه
ويشهد لك التاريخ وحقوق الانسان
وتشهد لك عقول الرجال النصوفه
وتشهد لك جهود الوفا بأرض شيشان
وتشهد لك البوسنه وتشهد كسوفه
لك همة فوق المجرة والاكوان
ولك راي امضى من قواطع سيوفه
ان قلت طيب فانت للطيب عنوان
وان قلت رايف فانت نبع المروفه
وان قلت محسن فانت سيد الاحسان
وجودك شهد به مجلسك مع ضيوفه
كم جاك محتاج فقير وشفقان
ومديت له كفك وزانت ظروفه
وكم جاك محزون بدت فيه الاحزان
واذهبت عنه الحزن وامنت خوفه
وكم من يتيم دمعته فوق الاوجان
مسحتها واطفيت نار بجوفه
الله لنا يبقيك ذخر وسلطان
تكفل يتيم الشعب وايضا ضعوفه
وادعي لك الله خالق الانس والجان
يحماك عن غدر الزمان وصدوفه
وبالآخرة تأخذ كتابك بالايمان
وافعال راع الطيب دوم مخلوفه
سلمان خيره فاق همال الامزان
والجود نعرف منبعه من كفوفه
ما احصي وصوفه في قصيدتي ولوكان
معجم قصيدي زايدات حروفه
ما احصي وصوفه مارمانيب غلطان
ان قلت في مدحه لقيت الكلوفه
سلمان شبل من سلايل كحيلان
اللي جمع لجل الجزيرة صفوفه
دخل جزيرتنا معه سيف وحصان
وبالسيف طوعها وجته معسوفه
جاها وعم الامن فيها والامان
من عقب ماهي بالشرور محفوفه
وخلف لنا اشبال كرام وشجعان
وعدوهم عسى المصايب تحوفه
عدوهم جعله على الدوم خسران
وندعي عليه بكل شر يلوفه
وصلوا على المختار من نسل عدنان
اللي صدع بالحق ساعة وقوفه
