يا عيد ما عندي كلام بقوله
الشوق كاذب والمشاعر دخيله
يا عيد انا لي فيك ذكرى طفوله
بس الزمن يا عيد ما فيه حيله
أنا ادري ان النفس ثكلى جفوله
العيد راح وماتوا افراد جيله
اول وانا لي فيك صوله وجوله
واليوم مثلك غاب واعلن رحيله
إلى متى والنفس فيك امهبوله
الحال واني والليالي طويله
يا ليت عيد اول تأخر أفوله
واقبل جريح الوقت وأروى غليله
يا زين عيد أول وذكره وزوله
ويا زين صبحه لا تجلى وليله
ويا زين ناسه طيبين العموله
أهل الوفاء والدّين وأهل الفضيله
لا جاء بشير العيد وأعلن حلوله
تباشروا به كل أهل القبيله
واجتمعوا أطفال البلد والحموله
كل يبي عيديته والحصيله
كل صباح العيد ذهب ذلوله
واقبل على أهل الطيب قلبه دليله
أحدٍ خذا عيديته بالسهوله
وأحدٍ تباطاهم وقِفّى بخيله
اللي عطاهم ودّعوه ودعوا له
واللي تعذر دوّروا عن بديله
أحدٍ كفوفه بالهدايا وصوله
وأحدٍ يدينه بالعطايا بخيله
وأحدٍ يغلظ من ورى الباب قوله
وأحدٍ يوفي لا اقبلوا صاع كيله
الله بالأيام دايم عجوله
كم فرقت ما بين خل وخليله
ويا عيد ما عندي كلامٍ بقوله
القلب دامي والمدامع هميله
