أقول في نفسي وأنا أعايد الناس

متى بشوفك تكمل أفراح عيدي

أجامل وربي عليم بالاحساس

وش هو شعوري وأنت عني بعيدي

الى خذاني لك على السهر هوجاس

ما كني إلا وسط ربعي وحيدي

لو حسوا بما بي يقولون لا باس

بدال قولة: عل عيدك سعيدي

لا صرت عندي وقتي أعياد وأعراس

حتى ولو في وسط سجن الحديدي

لو دلني عن ليلة القدر نوماس

والله ما طلب غير شوفك مزيدي

عاشرت خلان وتخالطت باجناس

ما احدٍ سواك أهديته القلب بيدي

من تحت ماطا القدم ليا هامة الراس

كلش هويته فيك والله شهيدي

لقيت بك ذوقي وأنا قاطع الياس

ومعك ابتدا يحيى الأمل من جديدي