ان كان تبغوني على طول ما ضيق

وانسى هموم بالضماير تروعي

خلوني اشم الهواء بالصعافيق

وسج رجلي مع نبات الفروعي

يا ما حلانف الهواء للزماليق

برض خلا ما به من الناس دوعي

قفر نباته ما وطيبه ولا ذيق

إلا الطيور مغردات اسجوعي

هذاك كيفي واسمعوا يا مخاليق

شوف الفياض المخضره هو متوعي

برض بها تلقا الزبيدي مفاتيق

بالقاع تأثيره سوات الصدوعي

لا صرت طلق الراس ضمن المطاليق

شم النسيم الطلق للروح يوعي

مع جملة عيال نشاما مشافيق

للمرجله والطيب دايم تنوعي

الكل منهم ذرب ما فيه تبريق

ما هو من الفرجه ملول وجزوعي

هذي مناتي والسعد والتوافيق

بيدين من خلقه على كل نوعي

لا شك اسلى خاطري بالطواريق

وحب الطبيعة من ركايز طبوعي

انا بدوي والله ما ارتاح وافيق

الا على ذكر الحيا والرجوعي

اليا بدا وقت الحيا زدت تشويق

خطر من الفرحة تذارف دموعي

من لا مني ما يعرف العلم ويطيق

قليل ميز ولا يعرف السنوعي

ما له نصيب بشوف ذيك المغاديق

خضر الفياض اللي سوات الزروعي

وغدران تسمع له صليل وتصفيق

وسط الملازم يطربن السموعي

هذا الخير والعلم صادر

شهادته من روس كل الجموعي

يا الله يا فتاح بوب مغاليق

يا عالم في غيب صم الضلوعي

تسقي وطنا من مزون مساويق

لما غزير الماء قلب كل قوعي

وختامها صلوا صلاة بتوثيق

على النبي صلوا صلاة الخشوعي