خاطري بالبر يلقى سلوة له
يعشق البران لو كانت يباسي
كيف واليوم اكتست في خير حله
حلة خضراء وياما احلى اللباسي
الخلا ثوبه خضر ومفصل له
فصله رب الخلايق بالمقاسي
الربيع الزين يشفي كل عله
والنفل لافاح ريحه طاب راسي
ماحلى الرقروق والفقعه بظله
الجبا هو والزبيدي والخلاسي
والزهر يبهجك واحجاجك يفله
في فياض ماوطا فيها المداسي
لاتعانق مثلما خل وخله
منظر لاشك له مانيب ناسي
جالسين مع خوي مانمله
نحمد الله وقتنا ماهوب قاسي
عند ضو الرمث والقهوه بدله
بهرت بالهيل وعدله بالحماسي
راضي بالي ونفسي مسفهله
مسفهل ماعلى وجهي عباسي
عايشين بعز ماعشنا بذله
بالسعودية هلي ربعي وناسي
تحت ظل اللي له الاسلام هله
خادم البيتين قايدنا السياسي
في قلوب الشعب معروف محله
يا الله انك تحفظه من كل باسي
نحمد اللي ينشي السحب المظله
يوم تقبل مثلها مثل الرواسي
يشتعل براقها والما تهله
من رعدها مايجي عيني نعاسي
الشكر والحمد للمعبود كله
ربنا اللي لاحشا مامنه ياسي
