صباح الخير والدنيا بخير ولا علي خلاف
ما دام ان القلوب من الوفا والحب مليانه
عيال اليوم واللي فات فايت والقلوب نظاف
وانا والله ما انسى من غمرني فايض احسانه
أقدر وقفة اللي ردت الحذفة على الحذاف
واثمن كلمة يمكن تغيض فلان وفلانه
اكن الها الغلا واثر الغلا في هالحياة اصناف
ولكن اصدقه حب سكن قلبي وشريانه
اصونه واحرصه واضفي عليه عن العيون لفاف
واخليه يتربع في محل صار عنوانه
ورى حدب الضلوع وكني اشيله على الاكتاف
وانا الممنون والمعروف للمعبود سبحانه
ولو صديت قصدي غير ما صديت عنه عياف
خطاه ان كان عندي ما عرف قدره وميزانه
تقيدني تقاليد العرب واراعي الاعراف
جوادي ما ركض في غير مضماره وميدانه
عنانه في يميني قاضبه واشرف عليه اشراف
حذر لو الحذر ما سكت الشيطان واعوانه
انا ابغض ما تشوف عيوني المستهتر المزهاف
ليا منه تكلم ما درى وش ينطق لسانه
انا صابر وابا اصبر واتصبر لو علي اجحاف
من اجل الدرة اللي في طلبها النفس ولهانه
على حيد البحر والموج حاديني عن الاصداف
عسى الله يرزق البحار بالمحار والدانه
