أسوق اللغز لأهل الشعر واللي وده يحله

لكم عبر التراث اليوم في بيتين توصيفه

الا ياويش رجال الى منه مشى كله

سريع وياصل الغاية واكيد الصعب توقيفه

الى منه وقف موته حصل واحدث معه خله

من الأحزان والتفريق وألا ياكثر تكليفه

حمى الله دارنا بالأمن والايمان والمله

وكفانا شر من به شر واللي نفسه ضعيفه

الا يا كيف نهنا بعيش وارض القدس محتله

و«صواريخ» العدو فيها تجوب ديارها وريفه

وهذا اللغز يا نايف بعثنا لك هنا حله

ما بين اقواس مكتوب وعلى المعبود تصريفه

الا يا اللي حبكت اللغز وسقيت القلم حله

نبي ناخذ ونعطى لين يثبت كل تعريفه

ترى الصاروخ تدمير الهدف من قبل طبع له

وهذا حل لغزك من رصد فكري وتأليفه

على متن السحاب أقبل.. يسوق العطر ويدله

عبير ما سرى لين الشمال أرخت مجاديفه

ألا يا للي تشوف ابن الشراري بالعجل قله

ترى مثلي ليا هبت شمال يطيب له كيفه

أقوله والعرب تسمع كلامي دقة وجله

عقب ما طار )صاروخ( الحقايق واعتلى طيفه

نشوف اللغز بالجمعة ولابه واحد يمله

ألا يا زين صفحتنا ويا ما احلى سواليفه

سلام الله عليكم يالشراري صافي الخله

مع اللي يكتب الأشعار بالصفحة تواليفه

أقول الحل صاروخ يشيل الملح والقله

عسى ربي يقينا الشر في لطفه وتصريفه

يا زين اللغز يا نايف ما دام انه على حله

والا يازين قافيته والا يازين توليفه

قريت اللغز وبساعة عرفته دقه وجله

وكتبت الحل والشاعر يجي قافه على كيفه

ألا يا نايف الصاروخ صار بوقتنا عله

عسى الله يبعده عنا بلوعاته وتخويفه

هلا بالشاعر اللي من شمال المملكة قل له

ترى لغزه باحله واتلمس حول توصيفه

ترى الصاروخ وقت الحرب يرسل والهدف دله

ترى اللي صممه يفهم وتوجيهه على كيفه

تفضل قدمك أهل العرف واللي مقفي خله

على مجلس تراث المرجله ما ضاق من ضيفه

رفعنا بيرق الترحيب يا الاسيد وانفله

هلا بك وابن عمك ما تناسينا مواقيفه

هلا باهل الشمال أهل الوفا والهيل والدله

وقف للسكود باتريوت في عالي مشاريفه

الا يا زين طلعات الربيع وصبة الدله

بدار ما يجيها الا الحبارى ما بها خيفه

الا يا نايف الأسيد لغزك واضح حله

اخذ رده سريع أسرع من )الصاروخ( تأليفه

إذا طلت علينا تراث أقول أهلا بها الطله

وشاعرنا بعد معروف ما يحتاج تعريفه

قصد في لغزه الصاروخ والشعار تفطن له

والا يا كثر ما دمر شعوب صابها حيفه

من قصيباء نبي نشارك بحل اللغز ونحله

عسى ربي يوفقنا ولو هو صعب توصيفه

قريت اللغز في صفحة تراث للعرب كله

يعين الله محررها ومخرجها وصفيفه

ترى الصاروخ كان أرسل يعبر أجواء الفضاء كله

الا يا الله تفك الناس من شره وتهديفه

الا يا مرحبا باللي يقول اللغز ويهله

عرفنا لغزك الوافي الا يا زين توليفه

ترى الصاروخ مقصودك كفيت الشر والعله

على راس العدو يطلق على صهيون تكثيفه

نطهر قدسنا من طاغي ملعون محتله

الا يارب تنصرنا وتوقف كيده وزيفه

طوى طول الغياب بخاطري يا حي هالطله

جميل من جميل يشغل التفكير توليفه

تخطى في مساره )الصاروخ( وأذعن له

صعيب القاف والمعنى تخضع له على كيفه

نعم صاب الهدف هاللغز بالمقياس واحتله

وهز أشواق قلب يستثير اللغز تصنيفه

يا ابو محمد عبر فاكس نبي نرسل لكم حله

عسى ربي يوفقنا الى حله وتعريفه

ترى مقصدك صاروخ لاوجه للهدف دله

وانا هذا حسب عرفي ومن قولك وتوصيفه

عرفت الحل يا الغالي يقوله واحد دله

بساعة من قرا لغزك وهو مجيب لتعريفه

ترى الصاروخ يا نايف جواب مابه اشكله

الى منه مشى بالجو سريع وصعب توقيفه

هلا باللي كتب لغز وجانا طالب حله

لك الله جاك حله ما يبي صبر وتسويف

ترى )الصاروخ( لا من طار ما يبغى من يدله

على برنامج يمشي وله ضربات مخيفه

كفانا الله شر اللي عميل وخالف المله

يحقق رغبة الطاغي ولو زانت سواليفه

حبكت اللغز يا الشاعر وربي بلغن حله

عظيم الشان سبحانه يصرفنا بتصريفه

وقلت الحل معروف وغزير الشعر يفطن له

نقول الحل صاروخ وما نحتاج تعريفه