قررت اغيّر صورتك من خيالي
روحي عسى درب السعادة لقيتيه
خوذي معك ذكرى السنين الخوالي
وخوذي معاك اجروح قلب قتلتيه
بسلى كما يسلى الحب سالي
وبهجرك مادام حلمك طويتيه
ما عدت انا اللي في شعوره يبالي
وش عاد لقالوا حبيبك تركتيه
يومي سما في عالمك وانت غالي
كلا الغلا مغليك ليتك نصفتيه
كنت انسج الاحلام وانتي اقبالي
كنت ارسمك آمال شيٍ خبرتيه
من هذبك من طبعك بالدلالي
غيري ترى والله ما حد خسرتيه
ياما نثرت الدمع مما جرالي
وياما شكيت الحب صدق وشكيتيه
يمكن نسيتي شوقنا والليالي
عهد مضى من بيننا ما وفيتيه
رمز المودة بيننا كان عالي
واليوم في سابع ثراها دفنتيه
تركت كل الغيد جيتك لحالي
بعت الجميع وتالي الوقت بعتيه
قادك غرورك والدلع والتعالي
طبع الغدر ذنب بحقي جنيتيه
حب الوفاء ماله بقايا وتالي
جسم انبرى من زايد الهم زدتيه
حلفت انا ما قول يوم تعالي
نفسي عزيزة حرمت ما وطيتيه
روحي عسى دربك سعيد وحالي
صغت القرار ابيات علك قريتيه
