باسم ربي ذا القصيدة ابتديت
الله اللي كل عبدٍ له ذليل
حب ذا الدنيا أنا منه قضيت
وش تفيد بوسط قبر مستطيل
قدرة الله مقتنع فيها ورضيت
ما عليه اليوم شي مستحيل
ليتني عن ذا الفجيعة ما دريت
كان حزني ما لقى يمي سبيل
ليتني ذيك الجريدة ما شريت
كان ما نكد علي علم يهيل
ليتني صفحة عزاهم ما قريت
كان دمعي من عيوني ما يسيل
لا طعام ولا شرابٍ اشتهيت
وكل شي صار قدامي يميل
بوسط بيتي غرفة فيها انزويت
وهاجسي مني أخذ وقت طويل
يا لله اني تحتك البارح بكيت
اطلب انك ترحم عيال العميل
قمت اصلي وعقبها ربي دعيت
جعل (صالح) (1) جنتك فيها نزيل
و(أحمد) (2) اللي بدعوتي ربي نصيت
يرزقه جنة بها ظل ظليل
القدر والموت مقبل ما حييت
يا الله أني دايماً يمك دخيل
كان نفسك عن هواها ما نهيت
عد نفسك صاير اكبر بخيل
والصلاة إعداد كل حي وميت
على الرسول اللي غدا ماله مثيل
