حبيبي ليتنا نرجع مثل اول نصير احباب
ونطوي صفحة فيها عذاب الوقت وهمومه
حبيبي من قدر يرسم معاناته على ذا الباب
انا والا انت والا واحد ضاعت به حلومه
حبيبي كنت أهوجس بك قبل لا يبتدي اعجاب
وشفتك وابتدى الاعجاب يصحي العشق من نومه
تعال نخلي الواقع يصدقني وهو كذاب
ونهدي له عقود الصدق قبل لا ينتهي يومه
تعال وخلنا ننسى زمان انتهى بعتاب
ترى قلبي من عتابك كسير وكثرت سهومه
سهوم جرّحت قلبي وهو في حبكم قد ذاب
أمانه انزع سهوم بوسط القلب منظومه
حبيبي فيني أشواق عجزت أضمها بكتاب
تنادي لك تقول ارجع غصون العشق ملمومه
حبيبي ليتنا نرجع ترى لون الهوى جذاب
ونفتح صفحة فيها عقود الحب منظومه
