ول ياللي ماتبي للناس زود

ودك الميزان ينقص بعدده

كن ماغيرك على الدنيا وجود

ماتبي غير انت يطيب سعده

المطر لو صار بيدين الحسود

مانشا مزنه ولادن رعده

وده ان المي مايبل الكبود

حتى عن خضر البساتين حسده

يحرق الاثمار وازهار الورود

من شروره مايفك الا الحده

حاسد وطماح بلحيل وحقود

كلفه حب الطمع فوق جهده

لو بلغ ماله كثر رمل النفود

ماشكر فضل الكريم ولاحمده

ينكر الحق لو عليه اربع شهود

مره وحده في حياته ماشهده

للشهاده من خلقه الله جحود

لو تشوف عيونه النور جحده