لاتسألين حروفنا عن نزفها يا غاليه
حنا مخاوين الوجع في مفرق الدرب الطويل
ماندعي هم وحزن ليت الضماير ساليه
ماكان سطرنا الألم,, ولارضينا به بديل
ولاكان شيعنا الفرح والذكريات الباليه
في موكب اغرب قصة القاتل يشيع قتيل
وجروحنا ماسامحت متغطرسه متعاليه
ترفض تلم احزانها والصفح سابع مستحيل
الاوله لو شلتها تنقض طعون التاليه
ماتعترف ياصاحبي في حكمة الصبر الجميل
جفت ينابيع الفرح منه المشاعر خاليه
شمس الاماني ودعت غابت ورى شط الاصيل
وحروفنا تنبض الم دقاتها متواليه
ولولا الحزن يالمترفه ماصار للورقى هديل
ولايبتهج من تحرقه بالجوف نار صاليه
لو يرسم البسمه ترى في داخله قلب عليل
لا تسألين حروفنا,, وحروفنا ياغاليه
خاوت مخاوين الوجع في مفرق الدرب الطويل
