على فراق أمي تجرعت الأمرار
والله يلوم اللي لحالي يلوم
الله يغفر لك وينجيك من النار
ويكفر ذنوبك في كل يوم
عساك في الجنات مع سيد الأبرار
حيثه كريم يرحم اللي يصوم
الله أكبر صار شوفتك تذكار
وأول أشوفك كل ساعة ويوم
القلب في حسرات والدمع مدرار
والحال شينة والحلال معدوم
فقدك كبير قلتها سر وجهار
ما ظنتي أنساك مادمت أصوم
ميتتك في شهر كريم ومختار
قد فضله ربي على كل يوم
فقدناك يا يمه صغار مع كبار
والكل جانا معزي ومهموم
يقول واعزاه من فقدت الجار
اللي لهم حق علينا معلوم
هذي سواة الله في كل الأقطار
والكل ميت هذا أمر محسوم
ماحد سبق يومه ولو ربع معشار
أمر الولي نافذ يا بن القروم
الطيب اللي ما شكى منهم الجار
ومقدرينه دايم ومحشوم
والخاتمة صلوا على سيد الأبرار
على النبي المصطفى كل يوم
عداد ماهبت نسايم وأمطار
واعداد نبت قد بدا في الحزوم
