البارحه ممسيٍ مرتاح يا المسلمين
امزح مع الخافق المظلوم وازايده
امزح وصارت حقيقه واستلم يا الامين
يافكر حضر جميع الشّرد النايده
أبا احتزم واجتهد واحرص وقلبي فطين
واسهر وابا اداري المعنى وابا اصايده
والى هرجت الحقيقه جعلكم سالمين
هاجوسٍ اودعه هاجوسٍ اعايده
بالمبتدا الله على الدنيا واهلها يعين
دنيا تبذالخفا وامورها كايده
قال المثل يامعين تعاون المستحين
اللي من الوقت كل اقلوبهم جايده
دايم على سلمهم مهما تشين السنين
محيين سلمٍ هله ياللاسف بايده
الكلمه الاوله نبدا بها من يمين
والكلمه الثانيه تمر ومحايده
صدور بعض العرب ديوان شعر ثمين
وصدور بعض العرب هرج بلا فايده
هذا كلام الحقايق والخوافي تبين
وكل على رغبته يمشي على سايده
