مرحوم يا شيخ على الحق ممشاه
مرحوم ياشيخ جهوده كبيره
مرحوم ياللي زاهد وسط دنياه
ما غرته دنياً بعينه حقيره
تبكيه عنيزة,, ويبكي مصلاه
ومكة وطيبة والرياض وعسيره
وينعاه دين الخير,, والحق ينعاه
وينعونه العربان في كل ديره
واسلامنا بكل الدول كيف ينساه
وحتى البحر ينعاه وأرض الجزيره
(ابن عثيمين) الذي ساس مبناه
بالعلم والاخلاق وحسن تعبيره
منه استفاد الناس نصحه وفتواه
بالعلم والتعليم نفسه غزيره
عالم جليل كيف وشلون ننساه
راع العلوم ابو المزايا الكثيره
الدين من فرقاه ياعظم بلواه
يا الله تعوض العلم في شخص غيره
وبجنة الفردوس يارب تجزاه
مع الرسل ومع الصحابة مصيره
مرحوم ياشيخ على الحق ممشاه
مرحوم ياشيخ جهوده كبيره
