يا الله يا منزل تبارك وياسين
على نبيك بالهدى والبشاير
للمؤمنين الصائمين المصلين
الصابرين منورين البصاير
ونذير لعبادٍ عن الدرب غاوين
على المعاصي يسدلون الستاير
غلف القلوب الضالين المضلين
يمارسون من الذنوب الكباير
لو كان عنها الناس ماهم بدارين
الله رقيب ومطلع بالسراير
ويا سامع اللي في دجى الليل داعين
عالم بخافي ما تكن الضماير
أنت مغيث عبادك المستغيثين
بأمرك وتدبيرك تدور الدواير
أجبر عزاء الإسلام في بن عثيمين
اللي قضى نحبه على الحق ساير
وأجبر عزاء الأمة ملوك وسلاطين
وشعوب الأمة من شيوخ وعشاير
العالم اللي بين الحق تبيين
فقده خسارة من كبار الخساير
ماهو على الدنيا خسارة على الدين
شيخ بعلمه يهتدي كل حاير
من فيض فقهه كلنا مستفيدين
ماينكره في المجتمع غير باير
ومن بحر علمه ينهلون الكثيرين
مخلص لربه ما يدوّر براير
ماهمه الدنيا وجمع الملايين
ولا صار همه في طوال العماير
همه يخدم الدين فالعسر واللين
وتعليم من تخفى عليه الشعاير
دمث الجناب الكل من جوه عانين
ان جاه مستفتي ولن جاه زاير
مع علمه الواسع يحب المساكين
وعلى عدو الدين بركان ثاير
أحزن على فقده وغيري حزينين
كم عين من فقده تهل العباير
لكن يا ربي بدبرتك راضين
حكمك عدل ماهو على العبد جاير
ولابدنا بعده على الدرب ماشين
الحي لابده إلىالموت صاير
رحل عسى يكتب كتابه بعليين
وعلمه بقى لأمة محمد ذخاير
عساه مع رسل من الله قريبين
في جنة عليا تشوق النظاير
يرفع مع الرسل الكرام التقيين
فوق النمارق والمفارش حراير
في جنة فيها غروس وبساتين
مابين حور عين ماهن ضراير
وصلوا على خاتم جميع النبيين
اعداد ماغرد على الغصن طاير
