إن جيت ابشرح غلطتك كيف سويت
عيا القلم ياقف باصابع يديني
خليتني مجروح روح وتخليت
ولا عاد لك نية حبيبي تجيني
خليتني مجروح ظلمك وقفيت
وين السلامة ياعيوني وويني
حاولت افسر غلطتك لكن ازريت
ايضاً ولا انسى بمقبلات السنيني
جرح الخطا في خافقي صار له بيت
غذاه دمي ومشربه مي عيني
غلطه غلا من واحد ماتهقويت
ماكنت اظنك يوم بتبور فيني
حبك زرعته في ضميري وسقيت
بذره بدمعي لين طلعه يبيني
ولاكنت اظني باختياري لك اخطيت
ولا كنت اظن اللي حصل لي يجيني
وعقب السنين اللي صبرت وترجيت
جزاي منها عقدت الحاجبيني
هذا أنت ترحل مثل ماقبلها جيت
وسويتها ياسيد الحسن فيني
تركت لي دمع الحزن والتناهيت
ومن الالم تصفق شمالي يميني
