مانيب هلباج على النوم نعاس

همه طعامه لين كرشه ملاها

ادرج الدنيا بالافعال وقياس

نسعد عيون وعين نسحن دواها

لا ضاق صدري جبت نجر ومحماس

ودلال بيض غالي مشتراها

قم سو فنجال على خمسة اجناس

احذرتجي حرقة وبالك نياها

خلك لها عن كل عذروب حساس

قيس له الطبخة على قد ماها

حتى يجي فنجال يجلي للاعماس

عقب الصلف والسهر ما أكبر غلاها

خصص مشاكيل على النار جلاس

حبوس الرجال اللي بعيد مداها

بدوٍ به اللي للمعادين نطاس

مودع سمان الهجن يثلغ حفاها

والثاني اللي يثني الغضب بالرس

في ربعة يشبع بها من نصاها

والثالث اللي يحتمي دون الافراس

لا روحت خيل بخيل حماها

وباقي الملا لو ما تقهويه لا باس

هذارة المجلس قليل حلاها

لا نافع ربعه ولا حاش نوماس

ضباط مال ولا يذرى ذراها