يا مرحباً بالعيد يا مرحبا به

نفرح به ونفرح بشوف القريبين

كل تحلى كاشخ في ثيابه

وروّح يقول: مباركٍ عيدكم زين

لبسه جديد وكامل قد زها به

ومن الحلا يخشى تصيبه بعد عين

عايد هلَ الحاره وزار القرابه

وعايد جميع الربع,, هنّا المحبين

ومن الفرح عِدِّه يطير بسحابه

تضحك ملامح وجنته والحجاجين

وذاك اليتيم أواه ما حد درابه

يبكي وحر الدمع حرَّق له العين

خيم عليه بوسط عيده كآبه

روَّح أبوه لخالقه دون عامين

ودِّه بَعَد بالعيد يكمل نصابه

بكثر الفرح بالعيد مثل الوراعين

بس الولد ما حصّل اللي لها به

كل ما طلب شيٍّ يقولون بعدين

حالة تعيس وزود العيد ما به

كثر عليه الحزن والناس فرحين

ما له سوى ربٍّ لطف في مصابه

رحيم جوده شاملٍ للمساكين

ياناس سيروا نهج كل الصحابه

بمساعد المحتاج واللي يتيمين

حيث الفعل هذا كثير ثوابه

تلقى به الدنيا ويلقى به الدين