دخيل خل النار بالقسي واللين
ضوح الخيال اللي تكاشف ربابه
من يوم بيع الهيل بميه وعشرين
عقب الغلا ما أحلى شراه وشرابه
والله لو ناخذ به العشر عشرين
ان تشتريه ولا نحسب حسابه
لا وقفوا خطوا الرجال البخيلين
نشريه يوم أن المراوي يهابه
وحذرا من المسمار لو هو بقرشين
والرزق عند اللي يصرف سحابه
ترى الدلال لها حقوق وقوانين
ومن حطهن يصبر على طق بابه
وتكميلها جدع السفر والمواعين
وضحك الحجاج وللمسير هلابه
ومن عقبها بوصيك في حفظك الدين
وتبع الذي نزل بطاهر كتابه
وأوصينك عن ربعة سراد السفاهين
اللي مماشيهم تجيب الخيابة
ترى الرجال تميز الزين والشين
وكل على قده تفصل ثيابه
عقولهم عقب المناظر موازين
جيل كسب مدح وجيل خيابه
هذاي وصاتي دون بيع وتثامين
ظنيت بك والظن فيما هقابه
