ياناشدي وشهو جديد القصايد
سألتني مير انتبه واسمع القول
واسمع كلامٍ من هجوسٍ جدايد
فكري بهن له عدة ايام مشغول
مثايل فيها لمثلك فوايد
ما هي ثراويتٍ على غير مدلول
الأوله طاعة صدوق الوعايد
بالسر والإعلان بقوال وفعول
والثانيه من عقبها بالوكايد
طاعة رسولٍ جا بالإسلام مرسول
وأول ركن بالدين عقب الشهايد
خمسٍ مع المولى بها الحبل موصول
حافظ عليهن مخلصٍ بالعقايد
واد الزكاة اللي من الحول للحول
وإن جاك شهر الخير بالخير عايد
صم به وقم به وابشر بكل مامول
خلك تعيّد في نهار المعايد
عيدٍ مهو عيد آمل اللبس والظول
ثم طاعة اللي يبغضون الوسايد
ليا اونست شي وخص,, من شالتك حول
ومن عقبها خلك وسيع النبايد
خل الحجاج لمن تنصاك مفلول
وخلك لفعل الطيب راعي عوايد
وابذل من المعروف للناس مبذول
وخلك عن أهل الهرج دايم محايد
ترتاح وتريح ضميرك على طول
الهرج سمي هرج ناقص وزايد
خلوه شجعان الرياجيل لخبول
وترى المحانك والمعاير تقايد
طبع النسا,, فيه احشرن كل مبذول
واحذر كلامك لايجي دون سايد
خل الكلام لياتكلمت معقول
ولاتزعل أرضى,, ولو رضا الناس كايد
وانفع وتنفع راعي النفع مقبول
ورفيقك ولوشفت فيه النكايد
عيونك عيونك ولونهن حول
والصدق من خير الخصال الحمايد
والكذب عيب وراعي الكذب مخذول
