قم يا محمد واكد الحجز بالحال
نبغى السعودية ديار الجدودي
ما عاد لي في ديرة الشرق منزال
سلم العجم ماهوب سلم السعودي
قيت عشر أيام مارتاح لي بال
لا عاد يوم فيه طفت الحدودي
تركت دار العم والجد والخال
دار بها الطيب يبين ويزودي
ونزلت في دار على ألوان وأشكال
مدري من الإسلام ولايهودي
عيني بها شافت خرافات واهوال
لعل ما شافت لها ما يعودي
في وسط جاكرتا بلا ثوب واعقال
أمشي وكني حابستني قيودي
قلت السلام وقالوا الناس وش قال
قلت اتبع سلمي ونرقى سنودي
قالوا تكيف قلت للكيف فنجال
كيف على هيل وبن وعودي
ماهوب كيف مغنية كل موال
اللي تجيب الهرج بيض وسودي
قالوا هبيل وقلت صاحي ورجال
أحرص على ديني ولاجله نذودي
قالوا تمتع وانعش الحال بالمال
قلت اسمحوا لي ما نبيح السدودي
حنا السعودية على مر الاجيال
طبع لاهلنا حافظين العهودي
وقم يا محمد واكد الحجز بالحال
نبغى السعودية ودار السعودي
