بما أن الحياة بدبرة الله وأمرها محسوم
يسيرها تحت حكمه بترتيبه على الميزان
ولأن الله سبحانه على الدنيا هو القيوم
وهو الوالي على خلقه وبأمره سير الانسان
ولأنه خالق الدنيا ولا غيره بقى ويدوم
لذلك وحده الخالق تولى الحكم والأكوان
انه الكون يفعل ما يريده والقدم محتوم
ولا أحد يستطيع يرد ما يقضي رفيع الشان
أمر باللي نوى وأمره قضى بالحادث المشؤوم
تجلت قدرة المعبود والمكتوب صار وكان
ارادة ربنا تحدث ولا عنها بشر معصوم
مثل ما صار يوم الحادث اللي حطم الوجدان
حصل يوم الخميس آخر رجب لا عاد ذاك اليوم
نهار ثنين والعشرين قبل اسبوع من شعبان
سنة واحدة بعد عشرين من تاريخنا المعلوم
بعد اربع ميه وألف انقضت من هجرة الرضوان
نهار فيه سل الحزن سيف جاير مسموم
بلغ سمه بوسط القلب ما يسلم ولا شريان
بعد صار المصاب اللي بقى له في القلوب سهوم
سهوم حارقة سبة رحيل فرق الخلان
صحيح الموت حق وكل حي يدركه مفهوم
ولكن للفراق إليا حصل كويات من نيران
طوى التاريخ صفحة عن معاني للفخر وعلوم
وسوالف عز فيها للمراجل والكرم عنوان
معاني تجتمع في وصف رجل من خيار القوم
مثل سيرة عشير الغانمين محمد الخثلان
رحمك الله يا شيخ حزامة بالوفا محزوم
على صدره وسام المجد والمعروف والعرفان
فقدك الطيب باللي ما مشت رجلك بدري اللوم
وفقدك المسجد اللي كنت تجهر فيه بالقرآن
وفقدك أهل الحريق أرض الحريق وبالحريق هموم
وترى كل الحريق بغيبتك صابه ألم وأحزان
وفقدك الضيف والدله فقدك السائل المحروم
وفقدك البيت وأهل البيت والأصحاب والجيران
وفقدك اللي بعيد عنك باللي صار لك مصدوم
ولو ما قد تقابل بل مع جنابك سائر الأزمان
من الصدمة تأثر وابتدت عينه تعاف النوم
نعم والله علم باللي حصل في خافق حيران
يشارك بالعزا ويقول جعله كاسب مرحوم
عسى الله يرحمه وينزله في جنة السلوان
فقيد مات عقب له عيال في الزمان قروم
يعود محمد الخثلان فيهم ما بهم نقصان
وبما فيهم من أوصافه تقول القوم عند القوم
عيال محمد الخثلان مثل محمد الخثلان
