عيا القلم لا يكتب الحبر بالبوك

وعيت أفكاري لادعيته تجيني

الصدر ضاق ودك به الف داكوك

اظلم سماي وصرت كني سجيني

رجلي ليا من سرت في دربها شوك

شان الزمان وشان وقت الهجيني

السر لا تبديه حتى على اخوك

تلقى يسولف به عدو بطيني

ان قل مالك كل ربعك تعدوك

لو انت في وقت اللوازم تبيني

اصحابك الغالين يا فلان لاموك

لأتفه سبب من قل ما باليديني

وقت مضى بالراي والشور بدوك

واليوم ما تذكر مع العايشيني

العيد وان عيدت ما قيل مبروك

ولا قيل عايد عيد كم يا ضنيني

ناس تجيد اللف بحبال وشروك

وناس تجيد الفهلوه باليديني

احد يدير البوصلة عكس مربوك

يضيع لو هو في اطراف القطيني

واحد يديره لجل غايات وشكوك

عجفاه عند الربع صارت سميني

هذا زمان المستحي فيه مدروك

يمسي ويصبح ما لقى له عويني