مساء الخير والمبدا بذكر الله المذكور

ولا فيه أخير من البداية بذكر الله

مساء الخير قبل الهيل بين الرجال يدور

قبل يستوي ويفوح ريحه من الدله

يعطر مسا هالمجلس العامر المعمور

حضور الرجال اللي على الدين والمله

بعدها نبي نكشف عن الخافي المستور

ومن قال انا دكتور يكشف عن العله

عسى الله يوفقني طريق الهدى والنور

طريق السنع ما كل مخلوق يدله

عساني ليا حجيت حجي يجي مبرور

واعود وانا من حجتي سالم الزله

هذا راس مالي مكسبي ذخري المذخور

هذا والله اللي يستر العيب والخله

حريص على الماضي حريص على المأثور

حريص على ما يرفع الراس ما اذله

صبور على الشدات لو الزمان يجور

غيور على اهل الدار والجار والحله

بشوش لمن جاء ضيف يقلط على الميسور

هلا مرحبا به والحجاجين منفله

جزوع من الكلمة ومن هرجة المغرور

قليل الحيا ما يسبقه للخطا ظله

واحب الطبيعة والحيا والثرى الممطور

من الوسمي اللي ما ترك شي ما بله

سبوعين لين ان السهل والجبل والقور

تشوفه على مد النظر مخضر كله

واحب القصيده واندفع يمها بشعور

شعور تجيني صامله ما بها ذله

اعلق عليها من قلايد بنات الحور

واجمل محياها على شان ما امله

اماري بها وارضي بها الخاطر المكسور

وازعل بها من يفرق الخل عن خله

واجاري بها قرم على المرجله مفطور

ولا ابدي بها عند الصعاليك والشله

وصلنا عسانا ما لحقنا جميع قصور

لعل الهدف فعلا وصلناه لعله