قنديل ظلما الليال وبدرها البادي

منه الخبر شح والمكتوب مارده

حتى هجرت المنام وعفت مقعادي

وبحر الهوى تهت في جزره وفي مده

وأمسيت مثل الغريب بداخل بلادي

اللي طواه الهيام وبيح بسده

الذكريات الجميلة شربي وزادي

ولولا الأمل ما قدرت الصبر والشده

بين الحنايا بنى له صاحبي نادي

ومينا بقلبي مثل مينا بحر جده

ودي بشوفه ودونه حدني حادي

والبعد ما يرخصه لو طالت المده

عليه دمع العيون يسيل الوادي

لو صاب وادي حنيفه زاد عن حده

شح بكلامه وصدق قول حسادي

مرات يبني غلاه ومره يهده

ما يسمع الصوت لو اصيح وانادي

ما يدري انه يفرح ضدي وضده

لو يعتذر عن خطاه ويعترف عادي

كان الخطا من نعيم العود ما أعده

بعده مضره وهم وقربه اسعادي

مشتاق له ولكلامه مزحه وجده

وان ما حصل مطلبي ومناي ومرادي

يا شين بعد المحبة والغلى الصده

يا عاذل القلب في تبع الهوى غادي

خلك بودك وخل الغير في وده