مدري علام الذي بالحب ولعني
ما عاد أشوفه وهو يدري عن احوالي
اقفي ونا حالتي للبوح تدفعني
من لوعتي من عنا روحي وغربللي
ليا سرى هاجسي والهم يتبعني
كدرت ليل العنا من همي التالي
يا ليت قلبي عن الهومات يردعني
ليته مع اللي ينام وضامره خالي
العين عيت على السلوى تطاوعني
عيت تجي لي على كيفي ومنوالي
عذلتها وانتحت ما عاد تسمعني
تقول انا علتي ما عاد تتجالي
ما اقوى على فراق من بعده يروعني
اللي مقامه بوسط الموق نزالي
تبيني انسى ونا الحسرات تفجعني
هون ترى مطلبك يا صاحبي غالي
والحظ دايم ردي ما يوم متعني
ليا بغيت السعادة ما تهيا لي
ليا انفتح للهنا بيبان يمنعني
يحول دونه ردى حظ تصدى لي
كل الوسايل معه ما عاد تنفعني
وانا تعلقت لا مدرك ولا سالي
لعل الايام في سلواه تقنعني
ابنتظر والرجا ممدود بحبال
والا انها مع طري العود تجمعني
يمكن على الطول ياوي لي ويصفالي
