مملكتنا مجيدة والقيادة رشيده
والمليك المفدى كل كفه عطا
الله انه يبارك في خطاه السديده
الوطن والمواطن للأمام قلطا
أكتبي ياقصيم وحرري يا جريده
بين عشر السنين وبين حجم العطا
كوني من خلال القول جملة مفيده
واكشفي عن زهور الخير وجه الغطا
خلي اللي يعبر مع حروف القصيده
يعطي الصورة اللي ما حواها خطا
النما والتقدم مع مزايا عديده
تدهش اللي يشوفه عقب بعد وبطا
بالنظر ما يصدق والمشاهد تفيده
كيف يلقا مدينة في موارد قطا
صح خيره قديم وجاه فيصل يزيده
بر فيصل وعمه بالقصيم خلطا
واكتمل ما نريده بالمساع الحميده
حين فيصل برجله في ثراهاوطا
حقق اللي تحقق والمحبا وطيده
حب فيصل ووده في قصيمه سطا
