راح الذي لا رددوا سيرة الطيب
أو رددوا بسم الشرف والشهامه
أو رددوا باللي تقوم المواجيب
لهيبته,, حشمة,, وقدر وقامه
راح الذي له في حياتي مكاتيب
تشرح مواقيفه وتشرح كلامه
راح وتركنا للجروح المعاطيب
كن الوجود أركى علينا سهامه
تبكي على موته نخيل مراطيب
والطير نوره صار يشبه ظلامه
كن الحريق أسباب موته سراديب
الشيخ راح وما بقى إلا مقامه
يا عنك بعده ما لوقتي تصاحيب
وقتي بديت أحس جرح انقسامه
ما غير اسج مع التفاكير وأغيب
وأهيم مثل اللي شكا من هيامه
بس أتمنى بالبيوت الهناديب
من ضيقتي وأنوح نوح الحمامه
الكحل اشوفه من بعد غيبته عيب
يا كحل عين أمي وعين النشامه
بعده فلا للوقت قيمة وترتيب
كن الحزن قرر علي استلامه
لكن عزايه لو تشح المطاليب
في اخواني اللي لا بسين وسامه
تعلموا منه هلا مع تراحيب
في وجه من جاهم يريد الكرامه
وختامها,, بارجيك يا عالم الغيب
تغفر لمن صلى لوجهك وصامه
وتجعل جنان الخلد والنفل والطيب
تورق على قبره وتسقي عظامه
