يا عين يا اللي عناها تو ماجاها
شافت من اللي على الماضي يرجعها
شافت اطلال قديمة وانتثر ماها
ودقات قلبي على الاضلاع توجعها
هذي دموع الوفا يا عين ما احلاها
ياليت راعي الغلا ينظر ويشفعها
مرت سنين طويلة ما حسبناها
نمشي مع أيامها ونقول ما اسرعها
ذكراك يا نور عيني كيف بنساها
مثل الوثيقة على نفسي موقعها
لك صورة في خيالي منك اخذناها
والثانية في سجل الصمت طابعها
أهوى نجوم السما واسري بمسراها
وأجي بها مع هموم الوقت وأجمعها
كله من اللي غلاها صار فرقاها
الأقدار في حكمها وشلون نمنعها
ياشينها لوعة الحرمان ما اقساها
والروح منها كثيرات مواجعها
أنشد خوافي ظنوني كيف ابسلاها
وأرجع على النفس بالمكتوب واقنعها
