لا والله الا مات منا ولد عم
رجال يحسب بالمواقف حسابه
رجال في دينه ودنياه مهتم
ناشي على نهج النبي والصحابه
كساب للامداح ما يكسب الذم
راعي نقاء,, درب الردى ما مشى به
ما صد لاشاف الرفيق وتلطم
وعن من يزور البيت ماصك بابه
خلف,, على غيره,, بسيره تقدم
نال المراجل كلها في شبابه
تبكيه عيني ونثرت دمعها,, دم
الدمع من عيني تزايد صبابه
سيطر علينا الحزن,, والهم,, والغم
الحزن خيل في سمانا ضبابه
ويا الله يا اللي للخفيات تعلم
يافارج لأيوب مما ابتلى به
يا مغرق فرعون في غبة اليم
يا اللي لتشريعه منزل كتابه
تجبر عزانا فيه يافارج الهم
وقبر توارى فيه نور ترابه
وطالبك يارب المخاليق ترحم
فقيدنا الغالي وتجزل ثوابه
ا الله عساه بجنة الخلد ينعم
ويا الله عساها دعوة مستجابه
والتعزيه واجب علينا تقدم
لابوه واخوانه وكل القرابه
وعلى رسول الله اصلي واسلم
عداد ما طاح المطر من سحابه
