يا كثر لوعات راع الحب وجروحه
وخسارة اهل الهوى تغلب مكاسبها
أتعبت انا الرجل بالجيات والروحه
مغير اعدد مشاويري واحسبها
وانوح مثل الحمام اللي علا نوحه
والرجل في سكة المجمول متعبها
واللي كسر خاطري ياناس مملوحة
قلوب المحبين تسلبها وتعطبها
واسرار راع الهوى والود مبيوحه
واللي جرى لي ترى كله سبايبها
اثر المهاوي ما يدري وين مصلوحه
مغير يطرد هوى نفسه وينشبها
ياناس قولوا لها ما هي بمسموحه
لابد من ساعة ربي يحاسبها
وأكثر ظنون المولع قربت شوحه
ناره بوسط الحشا ما احدٍ يحس بها
خيمة هل الحب مبنيه ومطروحه
يا مولع القلب نفسك لا تعذبها
ياكم قلوب من العشاق مجروحه
دنيا المحبه كثيرات عجايبها
ما بين ياس ورجا والحزن وفروحه
هاذي طروق الهوى وانشد مجربها
والرابح اللي بها يشفق على روحه
يحذر دروب المخاطر ويتجنبها
