الحظ لامن برك ما عاد به ثابه

ما ينفعه قولةٍ بتزين الأيامي

ما ينفعه لو بذلت الجهد باسبابه

الحظ لامن برك للشخص ما قامي

لا من برك بان بالرجال مضرابه

ويعيش عمره ما بين هموم وأوهامي

من طاح حظه مع الدنيا يامشكى به

يشكي ويلقى التعاسة دوم قدامي

ومن زان حظه يصير العز مجذابه

يشرب قراحٍ وغيره صادرٍ ظامي

يابوي,, يامسندي يامقدم اللابه

أنت السند في نهار الضيق وحزامى

أنت السند بالدهر لا بانت أنيابه

انت السيد لاشكيت وزادت آلامي

يابوي حالي نحل والهم يرعى به

همٍّ برى الحال شفني جلد وعظامي

يابوي ماشفت قلبي شب مشهابه

يحرم علي الكرى في الليل ما انامي

يابوي نفسي من الأيام مرتابه

احترت بالمشكل وحارت بي أقدامي

وختامها باطلب الله يقبل الجابه

ويعين قلب من الأيام منضامي