أنشدك عن رجل رفيع وقاره

رجل بدونه ما تقلط ربوعه

طيب وطيبه بس خارج دياره

والا بداره ما تبين نفوعه

نرحب بصفحة للمعاني منارة

بعداد وبل فالبسيطة وقوعه

جادت لنا بلغز جزيل العبارة

حله جواز السفر عرفت نفوعه

اللغز له بنت تسير بمساره

تحل في داره وتطلع طلوعه

هذا الجواز اللي يمر السفاره

يحل بديار وعلى الله رجوعه

اللغز لو تخفيه نكشف اسراره

صاغة عريب الجد وهاذي طبوعه

أكبر هوية للسفر في مساره

اسمه جواز ولو تغير بنوعه

باسلوبه الناجح وحسن اختياره

الصدق هيله والنزاهة قدوعه

صدر على درب الصراحة مساره

عنده جواز ابداع يشعل شموعه

ثامر كتب لغز صحيح اختياره

لغز ثمين وكاملات فروعه

ذاك الجواز اللي عليه الاشاره

تاشيرة برضاه تمشي بطوعه

ثامر بنظم الشعر مثل المناره

ونفسه لجزلات المعاني بتوعه

ولغزك عرفنا رمعته باقتداره

جواز السفر يا مصغي لي سموعه

لغز السبيعي فيه فن ومهاره

جيد وفي تصميم معناه روعه

هذا جواز للسفر والزيارة

دون الجواز الشخص يصعب طلوعه

من الشمال ارسل حسين العبارة

يم القطيم اللي فريد بنوعه

الحر يفهم يا السنافي الاشارة

هذا الجواز اللي كثيرة نفوعه

لغز عليه مواصفات الحضاره

تمشي مع العالم كتايب جموعه

حله بموضوع السفر والسفارة

جواز تلقي باللوازم ارموعه

هذا جوازك لا نويت الزيارة

لو كان ما حددت شكله ونوعه

خارج بلادك سجله بالسفاره

وهذي سواة اللي يهمه رجوعه

الشعر دولة والجزيرة سفاره

تهتم به وايضا تجمع دموعه

واللي يبيه يمرها باختباره

وياخذ (جواز) الشعر بأكثر فروعه

يا كاتبين اللغز جزل العبارة

لغز يجي حله بتالي اسبوعه

مصدر جوازك من قطاع السفارة

قسم مخصص بالمناطق فروعه

يا ثامر محمد ترى العلم شاره

ولغزك مع الالغاز يا طيب نوعه

اخذ جوازك لا نويت الزياره

مسافر بلا جواز يلزم رجوعه

نجيب حل اللغز عند السفاره

من شاعر بالشعر ذا طول بوعه

والحل واضح صادر من قراره

هذا جواز تتبع الناس طوعه

أهلا هلا بك في جميل العبارة

يا اللي كتبت اللغز هذي رموعه

سجل (جوازك) عند راع السفارة

واللي يتهاون يبتلش في رجوعه

حل اللغز يبغى فنون وشطارة

ولا كل واحد يعرف اصله ونوعه

واحفظ جوازك عن خبيث وكاره

وترى الجواز ان ضاع صعب رجوعه

درك جوازك لا تجيك الخسارة

من ضيعه برى رصيده دموعه

يندم وياقف عند باب السفارة

ولا يدور من رفيق فزوعه

وش حيلة اللي راح وقته خسارة

ودنياه فيها كل شيء يروعه

وطاف (الجواز) وصار ما له زيارة

واجازته ما هي على كيف طوعه

ما أحب انا من غير اليوم داره

يروح للخارج ويترك ربوعه

ولغز السبيعي واضح بالاشارة

هذا الجواز وما أبي كل نوعه

يا مبدع الالغاز رمز واشارة

من عالج العسرات بانت ابدوعه

الحل واضح (والجواز) استمارة

من جرب الأسفار يعرف انفوعه

اللغز واضح ما تطلب شطاره

على طريق الحل تلمع شموعه

احفظ (جوازك) لا تشوف الخسارة

لا ضاع ما تنفعك كثرة فزوعه

يوم السبيعي بالوفا شب ناره

جينا على الحروة نبارك طلوعه

نتبع خطاه ,, ولو رحل عن دياره

عبر (الجواز) نشوف حزة رجوعه

صلوا عدد ما ثار عج بغاره

وعداد ما ينبت وتورق فروعه

وعداد من يحمل جواز وزياره

على نبي كل الامة تبوعه