ألا يا الله تحقق مطلبي يارب يامعبود

أنا سائلك يارب الخلايق ترأف بحالي

ألا يامخرج ذا النون من بين الثغور السود

وألا يامغرقٍ فرعون يومٍ كان متعالي

أنا طالبك ياخلاق تنصر عبدك المضهود

سبب طاعة حبيبه ياحبيب صار محتالي

عطاه الود وأوفاه الجفا والمهزلة مردود

ونزّل منزلة من حط له بالقلب منزالي

نسى الماضي عسى هالماضي اللي راح ما يعود

بفعله صار ميزان الوفا والود ميالي

حسافه ياحسافه كيف قلبي يخطي المنشود

وياتحطيم قلب كان للصعبات شيالي

بغى باب السعادة لكن إنه حصله مسدود

جزا وده دفع له صاحبه كل الثمن غالي

ألا يارب ترجع قلبي اللي صار كالمفقود

ويصبح عن وفاء ووصال من هو عذبه سالي