لادق هاجوسي تكدر صفا البال
راحت بي افكاري جنوب وشمالي
لو كان بالمجلس سواليف ورجال
ياخذني الهاجس بجو لحالي
يصور لي الماضي على كل الاشكال
واسيح مع شي تصور ببالي
لا قلت ابدله مع بطى الوقت لاطال
اومت لي الذكرى على راس عالي
سواة قنديل على راس ماطال
في ظلمة النسيان يشعل اقبالي
ذكرى جميلة حبها مابعد زال
مطبوعة بارشيف ماضي الليالي
لاجيت بعض ارسومها وشفت الاطلال
صفقت بالكف اليمين الشمالي
ذكرى رجال بالسلف صفوة اجيال
راحوا وخلّوا كل ماكان غالي
لاحل طاريهم جرى الدمع همال
اللي نحا واللي خذته الليالي
ما كن هاك الجو للبدو مدهال
بحد السهل من حد ذيك الجبالي
ماعاد اشوف اليوم نازل ورحال
العد والمقطان مرمس وخالي
وين البيوت اللي تقل حوزة جبال
منزالهم صامت عليه الرمالي
سبحان من غير هاك الحال باحوال
ما دايم إلا الله عزيز الجلالي
