سلام مني للربوع الحشامي
اهل الوفا والطيب واهل المعاريف
اللي علو بالطيب راس السنامي
مدهال للعاني وللجار والضيف
اهل الدلال معربين المقامي
ذباحة الحايل هل البن والكيف
ولا الردي ماله علي احترامي
أصد عنه ولاتجيني تحاسيف
اللي فعوله بس هرج وكلامي
مامن فعايل بس هرج وسواليف
اجنبه واترك كثير الاثامي
اللي على الاجواد يصنع تزاييف
يشعب ذلوله بين شرق وشامي
شغله يفرّق بين الاصحاب ياحيف
ماقدر اصحابه ولا ابتا العمامي
شين كلامه والعقل عنده اضعيف
من ضعف عقله مايجي كل عامي
إلا خسر ربعه بسوء التصاريف
يسمع كلام امرودعات الوشامي
اللي يحرفن المعاني تحاريف
وبين البشر طيّب وفيهم اخمامي
ضعيف عرف وخالطه قل تصريف
ونصيحتي لاهل العقول الفهامي
لو انهم بالعرف ناسٍ عواريف
لايرافقون اهل الردى والملامي
وراعي الردى خله كما عابر الطيف
