|
| تراث الجزيرة
نشرنا في عدد الاسبوع الماضي لغزاً كتبه الشاعر حميّد بن موسى السليمي,, وقد وصلتنا كالعادة عشرات الحلول الصحيحة التي اخترنا منها حسب اولوية الوصول الحلول التالية:
أقول لغز حميد ما به كلوفه
ومنى لابن موسى تحيات وانعام
هذا تراه الدم بانت وصوفه
واللي تبرع به يرى الخير قدام
في حاجته ياما نفوس شغوفه
مهما دفع به من كثيرات الاقيام
محمد بن عبدالعزيز الخنيفر
***********
أنا عرفت اللغز ما به كلوفه
عبر الجزيرة ناشرينه بالاعلام
أول بيوت اللغز تكشف وصوفه
ياللي كتبت اللغز تستاهل وسام
دم البشر غالي وكل يروفه
واللي يهدر الدم يبشر بالاعدام
خالد المويهان الحربي
بريدة
***********
حي السليمي عد مزن رفوفه
هلت ومن صوت الرعد ما حد نام
اللغز (دم) واجدات صنوفه
واللي تبرع به له الخير قدام
تبرعوا ياهل القلوب العطوفه
باللي تجود انفوسكم ما به الزام
منصور عبدالله المجيدل
الرس
***********
لغز السليمي لو قرينا حروفه
يا مرحبا يا حميد عام ورا عام
واللغز ليّه واضحات وصوفه
والحل عندي والبراهين قدام
الدم يجري في عروق تحوفه
ولابد ما نحميه عن كل جرثام
محمد بن معتق بن صخيبر
عنيزة
***********
لغزك يابن موسى جزيله وصوفه
وعرفت حل اللغز يانسل الاكرام
والحل دم له بنات معروفه
هي الخلايا ما بها شك واوهام
صالح محمد المضياني
الخرج
***********
لغز قريته واضحات حروفه
على الجريدة تكتبه روس الاقلام
اللغز ما به يالسليمي كلوفه
واضح وله بالشرع تفسير واحكام
دم البشر فيه الوصوف معروفه
من روسنا يجري الى روس الاقدام
زيد بن جريد بن سعدا
بريدة
***********
لغز السليمي بينات وصوفه
عرفت حله يوم طالعته شمام
الحل جاهز والوصوف معروفه
من هاجس ما يجهله نقض الابرام
الدم يجري والكريات جوفه
من مفرق الهامة الى روس الابهام
باني بن فايز السبيعي
الاحساء
***********
بديت باسم اللي يرى ولا نشوفه
هو الوحيد اللي على كوننا دام
الواحد المعبود نشعر بخوفه
اللي فرض خمس على دين الاسلام
لغزك عرفنا يا السليمي حروفه
الدم والكرات في جسمنا عام
زايد بن ونيس الحازمي
طريف
***********
اللغز ما يصعب على من يحوفه
ويسهل على رجل معه فكر ووسام
لو ان حله صعب وايضا حروفه
عند اهل الالغاز لا طاح,, ما قام
يسيل (دمه) قبل يمشي لجوفه
وقبل كرياته تحول,, للاقدام
محمد المويعزي
بريدة
***********
اللغز جيد واضحات حروفه
وانا قريته ضمن لوحات الاعلام
كل يحاول كان تسمح ظروفه
يمكن يجيب الحل في خط الاقلام
الدم حله ما علينا كلوفه
وان كان جاء خله يزيدن الاوهام
علي رشيد الرشيد
رياض الخبراء
***********
يا مرحبا باللغز عدة حروفه
واعداد من صلى صلاته ومن صام
من هاجس وان مرته ما تطوفه
يحلل الكلمة على روس الاقلام
والدم غالي بالنفوس معروفه
وحرام سفك الدم بالدين واجرام
فهاد عايض بن عمير
الرياض
***********
ياللي كتب لغز كمل في وصوفه
اهلا هلا بك عد ما طاير حام
واللغز لاهل العرف مابه كلوفه
حلة تراه الدم والرب علام
هندي نابت الغياثات
الافلاج
***********
لغز السليمي ما غدا فيه حوفه
متمكن بصياغته نسل الاكرام
الدم ذا حكمه وهذي وصوفه
حتى كرياته وتنظيمها التام
البيض منهن بالدفاع معروفة
والحمر تجري للتنفس والاطعام
علي نفل بن خشعان
نجران
***********
يا بو حمد صفحة تراث معروفة
بالمركز الاول لها عدة اعوام
قلته ونفسي يا الحميدي شغوفه
في صفحة حازت على درع ووسام
ولغز السليمي بين من وصوفه
والحل (دم) تحمله كل الانام
عطا الله بن سليمان العطا الله
الزلفي
***********
منول شبه الجزيرة مخوفه
واليوم صرنا بفضل تطبيق الاسلام
بأمن وامان وبيت ربي نطوفه
الله يديم الامن عام بأثر عام
وهذا جواب اللغز جتكم حروفه
(الدم) حل اللغز وابصم بالابهام
صالح بن محمد المحيميد
المدينة المنورة
***********
حميد لغزك بينات حروفه
حله مبين واضح يابن الاكرام
كم واحد من شوفته زاد خوفه
يمشي بخطه ساير طول الايام
هذاك دمك بينات وصوفه
يمشي بضخ القلب بالليل ما نام
أحمد سالم الدودلي
حفر الباطن
***********
اهلا هلا بك عد برق نشوفه
برق يشعشع بالدجى كنه لحام
لغز بسيط ولا بحله كلوفه
لو هو عظيم ومحكم فتله احكام
الدم الاحمر واضح من حروفه
لولاه ما ساروا هل الارض بعظام
خليف الحربي
الرياض
***********
لغز الجزيرة بينات وصوفه
لو السليمي مبهم حبكه ابهام
انا رمعته رمعة ما تطوفه
حله (دم المسلم) بلاشك واوهام
وبناته (كريات دم) معروفه
سياج لجسم الآدمي ضد الاسقام
سالم مقبل الغرابي الحربي
القيصومة
***********
يا مخفي الجرة بفكري كشوفه
الدم يجري بالاوادم والانعام
هذا الذي حرم علينا وشوفه
شريه حرام ايديننا سيد الاحكام
والدم في جوفه بنات يشوفه
من شاهد التلفاز في بعض الافلام
حجي بن سليمان الحجي
الرياض
***********
ان كان ما فيها عليكم كلوفه
خوذوا مرد اللغز حطوه قدام
الدم انا اكره يا السليمي اشوفه
الا لضيف او عيد والمقصد اكرام
وبناته كريات حمراء بجوفه
والبيض فيهن نفع دايم للاجسام
خالد بطي الخمعلي
بريدة حي الضاحي
***********
لغز السليمي واضح من وصوفه
ساعة قريته جبت حله بالاولام
يا حمد لغزك دم مسلم بجوفه
ومحرم هدره على كل الاسلام
ومن قام في هدره جزاها يشوفه
لابد من يوم يجازى بالاعدام
عبدالله مشعل الشمري
سكاكا الجوف
***********
مشكور ياللي صاغ لغز نشوفه
صاغة بمعلومات وأفكار وافهام
غاليك معروف وكل بجوفه
يسري بعروقه دايم طول الايام
بناته كريات وهي معروفة
بيض وحمر جاريات في الاجسام
سعد الكثيري
الحريق
***********
اللغز واضح والبنات معروفه
والادمي وده علىالزود قدام
جعل المساعي يا الكريم مخلوفه
تبرعوا بالدم من طيب واسهام
اهل الكرم ما حسبوا بالكلوفه
الى لفاضيف كريم على كرام
محمد علي السالمي
رفحاء
***********
ياللي بدعت اللغز ما فيه حوفه
ما تنقده ناس عواريف وفهام
وعلى رجال العرف ما به كلوفه
ما يتعب اللي معه تفكير والمام
دم,, البنادم,, واضح من وصوفه
كريات دم الجسم,, مفعولها هام
زهران عون الله المطيري
بريدة
***********
سلام يا من بالجزيرة حروفه
يا حميد الموسى للالغاز حجام
وسلام يا من بالجزيرة يحوفه
من قاري او ناشر على كل الاقلام
اللغز هو (الدم) نعرف ظروفه
واليا انعدم ما ينفع اللحم بعظام
عبدالله بن حراب
رياض الخبراء
***********
أعرف حلول اللغز واعرف وصوفه
طول الليالي علمتني والايام
(الدم) غالي مير ما هي احسوفه
لوضاع في حق الوطن والا الاسلام
دم الرجال اللي اتسوي اصفوفه
في حومة الهيجا لها كر واقدام
فهد الحزاب
الرس
***********
هلا هلا باللغز واللي يحوفه
عداد وسم غادي نبته اقسام
وان كان ابن موسى مخفى حروفه
حنا نجيب الحل لو هو من الشام
اللغز حله يوم تمت اوصوفه
الدم يوم الدم يجري بالاجسام
نافع الحربي
الرياض
***********
في صفحة التراث نقرا حروفه
لغز ثمين ومجودينه بالاحكام
هذاك هو الدم قلبك يحوفه
سبحان من سواه في وسط الاجسام
واللي تبرع بة جزاه معروفه
اجر من المولى ويعطونه وسام
عبدالرحمن عبدالعالي المطيري
الرياض
***********
ياللي كتبت اللغز بانت وصوفه
وانت الحقيقة محكم لغزك احكام
والحل نكتب لك مبادي حروفه
الدم غالي واكرمه دين الاسلام
وبناته اللي دايم وسط جوفه
كرياته اللي فيه مع طول الايام
فهد محمد السبيعي
الاحساء
***********
انا احمد الله ما علينا كلوفه
جبت المسطر ثم دنيت الاقلام
في حل لغز بينات وصوفه
اللغز واضح ما يبا زود تعلام
الدم حله يا السليمي نشوفه
ومن راح دمه يقضي الليل ما نام
محمد بن تركي الشلوي
العيينة
***********
لغزك قرينا بالجريده حروفه
يا الشاعر البيطار يا نسل الاكرام
والدم غالي وانت تكره تشوفه
لاشك كثرة شوفته تال الايام
محمد الدره بليا مروفه
كيف هدروا دمه عدوين الاسلام
عويض بن عواض العوفي
الرياض
***********
يا سايق الموتر لزوم وكلوفه
جميع راكب تلزمه يربط حزام
وخلك فطين للطريق وظروفه
وتجنب السرعة ترى البعض نيام
هذي الحوادث ما نعدد وصوفه
شاهد نزيف الدم عام ورا عام
نايف محمد الأسيد
القريات
***********
اللغز شدتني معاني حروفه
ومن عندي اهديك شهادات ووسام
والحل دايم يا السليمي نشوفه
اليا لفا ضيف يهدرونه اكرام
ودم البشر غالي وهو وسط جوفه
ويرخص ليا من حشرقت كبد ضرغام
فاضل زبن الشمري
الاحساء
***********
أهلا عدد غيث تزبر قنوفه
غيث يفيد الناس ويفيد الانعام
بالصفحة اللي بالقصيد معروفه
حياك ربي عد ما خطت اقلام
واللغز واضح كاملات وصوفه
(الدم) يجري داخل الجسم بنظام
علي بن محمد العمار
الرياض
***********
|
|
|
|
|
