خاطر فز شوق لسيده ثم هاض
والقوافي بسلمان الوفاء ما تشيب
سلموا لي على سلمان أمير الرياض
من مثل شيخ نجد مزود الطيب طيب
سيدي لو ملا قلبي غلاكم وفاض
فأنت يا ابوفهد للشعب كله حبيب
والشعر لو وصف حبي لكم واستفاض
واحد من عيالك ما بها الحب ريب
الظمايا بجودك يا ردون الحياض
مجلسك في الصباح وفي الظهر ما تغيب
طيبك اللي مع الأيام ما يوم غاض
من يعلق بك الآمال لا ما يخيب
لك حجاج طليق,, ووجه كله بياض
ممحل الأرض تنزل به ويرجع عشيب
خامة في السحاب,, ومنكبين عراض
لك وقار وقدر,, ولك حضور مهيب
ولك على موقف الشدات قلب غلاظ
فيك من طبع ابوك الصيرمي النجيب
ذاك صقر الجزيرة ليا انقض انقضاض
الحباري يطرحها بكف عطيب
طب للموت الاحمر في حياضه وخاض
عند بوابة المصمك وداس الحريب
بارق صادق في نجد بالخير ناض
حاكم عادل بالحق,, راسه صليب
وانت مثله سحاب ترتويه الفياض
الضعوف يتلاجون بذراك الرحيب
صفحتك في بياض ما عليه اعتراض
اجتمع في شهادتها بعيد وقريب
نحتفظ لك بحب المخلصين احتفاظ
كاذب راعي البهتان,, والله حسيب
أشهد ان الرياض بيدك صارت رياض
اصبح لها بمرأى العين سحر رهيب
