يا اللي تبي منا النصيحة هلا بك
ترحيبة فاح العطر من نسمها
يا غافلٍ وقف وراجع حسابك
العمر فرصه لا يفوت اغتنمها
مادام توك ناشي في شبابك
بالدرب رجلك لاتزل ابقدمها
امور دينك كلها في كتابك
احفظ عمود الدين قمة اقمها
ان كان زانت زين الله جوابك
وتحس بالدنيا ولذة طعمها
وللوالدين اخضع ولين جنابك
والناس دائم تحترم محترمها
خل التواضع والمراجل زهابك
وترى ضمير النفس سمي حكمها
وللضيف شرع يا فتى الجود بابك
أثبت وجود النفس يعرف عدمها
واحذر ترافق من يدنس ثيابك
رافق رجاجيلٍ كرامٍ شيمها
هذي نصايح قلتها والرجا بك
عساك تسمعها وتعرف قيمها
